De Heimaadvereen Seelter Buund is 1952 grünnt worden, un van Anfang an weer de Pleeg van de saterfreeske Spraak de belangriekste Upgaav. Van Denkmaalpleeg sull neet de Proot wesen man en lebennig Spraakpleeg weer dat Ziel. Dat heet: De Spraak sülvst stüttig verwennen un hör Gebruuk ok bi anner Minsken anregen.

Wat maakt word

De Seelter Buund organiseert vöölklörige Unnernehmens. För de Leden stahn Busreisen, elke Jahr dat Slachtfest, Grillavenden, de festelke Jahresversammeln bi Dockemeyer, all twee Week de saterfreeske Stammdisk, all twee Week de „Frühshoppen“ un noch vööl mehr up dat Programm.

För en groot Koppel van interesseert Lüü büddt de Seelter Buund saterfreeske Spraakkursen an. Besökers könen butendeem en Minikurs, de heel besünners kört is, maken. Daar gifft dat denn en „Seelter Tjuuchnis“ för. De Seelter Buund helpt bi dat Schützenfest in Scharrel düchtig mit, un dat Radiostudio van de Ems-Vechte-Welle is stadig to Gast in ‘t Vereenshuus.

Upgaven

De Seelter Buund informeert Minsken, de dat interesseren deit, geern över de Saterfresen, hör Wennsten un vör all över hör Spraak. De Seelter Buund vertreddt ok as Gespreckspartner stadig de Interessen van de Saterfresen. He arbeiddt eng mit de Gemeente, de Ollenbörgische Landskupp un vööl anner Parteien tosamen, um de Spraak starker to maken. För de Ems-Vechte-Welle versörgt he tweemaal in de Maant de Radiosendung „Middeeges“ mit Bidragen up Saterfreesk un Plattdüütsk. De Seelter Buund hett ok en lüttje, man interessant Utwahl van saterfreeske Drachten un saterfreesk Leesgood. In de Tokummst sall de Seelter Buund wieder to en Dokumentationszentrum utboot worden.

Stöön

De Seelter Buund kriggt elke Jahr ruugweg tweedusend Euro van de Gemeente Saterland, un hen un weer gifft dat Spennen. Daarum kann de Buund of un to ok Unnernehmens van annern stönen. So hett de Seelter Buund 2021 en Studienreis van junge Saterfresen na de Sorben mögelk maakt.

De Seelter Buund betahlt ok de ehrenamtliche Saterfreesk-Helperskes in de Kitas un Grundscholen ut. He verdeelt dat Geld, dat de Gemeente Saterland daarför to Verfögen stellt.

Tosamenarbeid

Natürelk is de Seelter Buund ok buten de Kuntrei good vernetzt. Karl-Peter Schramm un Johanna Evers vertreden hum in EBLUL Düütskland, in de FUEV un in de Minnerheidenraad, Georg Pahl hett de Vertreden in de Fresenraad 2022 an Heinrich Pörschke övergeven.

Huus

Siet 2002 hett de Seelter Buund en egen Huus. De oll Bahnhoff in Scharrel is för sien neei Upgaav in „Fräiske Kultuurhuus“ umdöfft worden. In dat Huus un up dat Grundstück d‘rumto is regelmatig en Bült los, butendeem worden Gasten upnohmen. 2021 wurr dat Huus renoveert un hett daarbi en Footdeelheizung kregen.

Upboo

De Seelter Buund hett en geschäftsföhrend Vörstand mit sess Lüü, de van de Vörstandsspreker Stephan Dannebaum vertreden word. Daarto hett de Buund en vergröttert Vörstand, in de butendeem Vertreders van de veer saterfreeske Oortsdelen en Sitz hebben.

Histoorje

1952 wurr de Seelter Buund för dat eerste Maal grünnt. Enn van de 60er Jahren gung dat Interess an de Vereen torügg. Na en lang Paus wurr he 1977 för dat tweede Maal grünnt. Unnern finnen Se en Dagbladdartikel over de eerste Vereensgrünnen:

Översetten: Ilse Gerdes, Plattdüütskbüro Oostfreeske Landskupp